बाँके । बाँके खजुरा गाउँपालिकास्थित एउटा मस्जिदमा अध्यापन गराईरहेका एक मौलानाले आफ्नै नाबालक छात्रासँग बहुविवाह गरेको घटनामा प्रहरीले कारवाही प्रक्रिया शुरु गरेको छ ।
खजुरा गाउँपालिका वडा नं.८ चमकदारपुर स्थित रहेको बिलाली मस्जिदमा छात्र छात्रालाई उर्दु र अरबी अध्यापन गराउने मौलाना अतीक अहमद खाँ एक वर्षअघि आफ्नै १४ वर्षीया छात्रालाई लिएर भारतमा लुकीछिपी बस्दै आएका थिए ।
मौलाना विरुद्ध उनकै श्रीमती मन्तसा खातुनले बहुविवाह र बालविवाह सम्बन्धी कसुरमा उजुरी दिएपछि ईलाका प्रहरी कार्यालय धनौलीले मौलानालाई पक्राउ गरेको हो । मौलानाको २ वटा बच्चा रहेको र हाल आफ्नै छात्राबाट समेत एउटा बच्चा जन्मिएको छ ।
हामीले एकवर्षदेखि खोजतलाश गरिरहेका थियौं, मौलानाकी श्रीमती खातुनले भनिन्, उनले विवाह गरेको छात्राको उमेर अहिले १६ वर्ष पनि पुगेको छैन । उसको एउटा बच्चा समेत जन्मिएको छ, उनले भनिन, अब हामीहरुलाई न्याय मिल्नु पर्छ ।
यसअघि मैले मौलानाको धेरै यातना सहें, उनको कुटपीटका कारण मेरो एउटा कानको जाली समेत फुटेको छ, खातुनले भनिन्, अब कडा कारवाही हुनुपर्छ ।
मौलानाविरुद्ध उनकै श्रीमतीले बहुविवाह र बालविवाह सम्बन्धी कसुरमा उजुरी दिएपछि बाँके जिल्ला अदालतबाट ५ दिनको म्याद थपगरि अनुसन्धान प्रक्रिया अघि बढाइएको ईलाका प्रहरी कार्यालय धनौलीले जनाएको छ ।
