बाँके । नेपाल विद्युत प्राधिकरण नेपालगंज वितरण केन्द्रले विद्युत महसुल बक्यौता नतिर्ने ग्राहकविरुद्ध सञ्चालन गरेको कडाइपूर्ण अभियानले एक सातामै उल्लेख्य सफलता हासिल गरेको छ। अभियान सुरु भएको ७ दिनभित्र २१ लाखभन्दा बढी बक्यौता रकम असुल गरिएको प्राधिकरणले जानकारी दिएको छ।
मंसिर १४ गतेदेखि थालिएको ‘बक्यौता असुली अभियान’ अन्तर्गत अहिलेसम्म ५२ लाख १३ हजार ४ सय ६१ रुपैयाँ बराबरको बक्यौता असुल गराउन ३२२ जना ग्राहकको विद्युत लाइन विच्छेद गरिएको नेपालगंज वितरण केन्द्रले जनाएको छ।
आइतबार मात्र १७ लाख ९७ हजार १ सय ७७ रुपैयाँ बक्यौता रहेका १२१ ग्राहकको लाइन काटिएको थियो। तीमध्ये १३३ जना ग्राहकले तत्काल बक्यौता भुक्तानी गरेपछि विद्युत सेवा पुनः जडान गरिएको वितरण केन्द्रका प्रमुख संजय कुमार मिश्राले बताए। उनका अनुसार आइतबार मात्रै २१ लाख ७६ हजार ५ सय १७ रुपैयाँ उठेको छ।
त्यसक्रममा ६ लाख ८९ हजार ४ सय ३१ रुपैयाँ तिर्ने ४४ ग्राहकको सेवा पुनः सुचारु गरिएकोछ। साथै कालोपाटीमा सूचिकृत एक जना दीर्घकालीन बक्यौता ग्राहकबाट १ लाख रुपैयाँ समेत असुल गरिएको केन्द्रले जनाएको छ।
प्रमुख मिश्राका अनुसार बक्यौता असुली अभियान अझ कडाइका साथ निरन्तर चलाइनेछ। “सबै ग्राहकलाई समयमा नै विद्युत महसुल तिर्न अनुरोध गर्दछु,” उनले भने। प्राधिकरणको नियमअनुसार ६१ दिनभन्दा बढी बक्यौता राख्ने ग्राहकको लाइन जुनसुकै बेला काट्न सकिने व्यवस्था छ।
यसैगरी आज आइतबार खजुरा विद्युत कार्यालयका इन्चार्ज दिनेश कुमार वलीको नेतृत्वमा खटिएको टोलीले लामो समयसम्म विद्युत महसुल नबुझाउने ५९ ग्राहकको लाइन काटेको छ।
समयमै महसुल नबुझाइ समस्या सिर्जना हुने भएकाले सकेसम्म छिटो महसुल तिर्न सबै ग्राहकलाई कार्यालयले अपिल गरेको छ।
विद्युत सेवा विच्छेद हुन नदिन सबै ग्राहकले नियमित रूपमा महसुल बुझाउन नेपाल विद्युत प्राधिकरणले आग्रह गरेको छ।
