बाँके ७ चैत्र। नरैनापुर गाउँपालिकाले इस्लाम धर्मावलम्बीहरुको महान पर्व ईद–उल फित्र (इद) को अवसरमा आइतबार सार्वजनिक बिदा दिने निर्णय गरेको छ।
गाउँपालिकाका अध्यक्ष इश्तियाक अहमद शाहद्वारा जारी विज्ञप्तिमा शनिबार ईद पर्व परेको उल्लेख गर्दै त्यसको खुसी साटासाट गर्न र स्थानीयवासीलाई पर्व मनाउन सहज होस् भन्ने उद्देश्यले भोलिपल्ट आइतबार सार्वजनिक बिदा दिने निर्णय गरिएको जनाइएको छ।
विज्ञप्तिमा “चैत ८ गते आइतबार सार्वजनिक बिदा दिने निर्णय भएको व्यहोरा सम्बन्धित सबैको जानकारीका लागि यो सूचना प्रकाशित गरिएको छ” भन्ने उल्लेख गरिएको छ।
गाउँपालिकाले सम्पूर्ण मुस्लिम समुदायमा ईद–उल फित्रको हार्दिक शुभकामना व्यक्त गर्दै यो पर्वले समाजमा आपसी भाईचारा, सद्भाव, सहिष्णुता र एकताको भावना अझ मजबुत बनाउने विश्वास व्यक्त गरेको छ।
ईद जस्तो महान पर्वले विविधता भित्रको एकता झल्काउँदै समाजलाई शान्ति, सहअस्तित्व र पारस्परिक सम्मानतर्फ अग्रसर गराउने गाउँपालिकाको अपेक्षा रहेको छ।
