काठमाडौँ- सशस्त्र प्रहरी बल नेपालका नवनियुक्त महानिरीक्षक (आईजीपी) नारायणदत्त पौडेलले दर्ज्यानी चिह्न लगाएका छन्। गृह मन्त्रालयमा आयोजित एक विशेष समारोहका बीच गृहसचिव राजकुमार श्रेष्ठले आईजीपी पौडेललाई पदको दर्ज्यानी चिह्न प्रदान गरेका हुन्।
गत सोमबार बसेको मन्त्रिपरिषद् बैठकले सशस्त्र प्रहरी अतिरिक्त महानिरीक्षक (एआईजी) पौडेललाई संगठनको सर्वोच्च पद महानिरीक्षकमा बढुवा गर्ने निर्णय गरेको थियो। सरकारको उक्त निर्णयसँगै उनले सशस्त्र प्रहरी बलको नेतृत्व सम्हाल्ने जिम्मेवारी पाएका हुन्।
सशस्त्र प्रहरीका तत्कालीन महानिरीक्षक राजु अर्याल १८ वैशाखमा उमेर हदका कारण अनिवार्य अवकाशमा गएपछि सो पद रिक्त रहेको थियो। अर्यालको बिदाइपछि नेतृत्वको रोलक्रममा रहेका पौडेलले अब सशस्त्र प्रहरी बलको कमाण्ड सम्हाल्नेछन्।
