बाँके । बाँकेको ८ पालिकामध्ये डुडुवा गाउँपालिकाले चालु आर्थिक वर्ष सुरु भएको दुई महिनाभन्दा बढी भइसके पनि अझैसम्म बैंक खाता सञ्चालनमा ल्याउन सकेको छैन । आवश्यक कानुनी प्रक्रिया पूरा गर्न नसक्दा पालिकाको खाता अवरुद्ध भएको हो ।
कोष तथा लेखा नियन्त्रक कार्यालय बाँकेका अनुसार बाँकेका सात वटा पालिकाले बैंक खाता सञ्चालनमा ल्याइसकेका छन् भने डुडुवा गाउँपालिकाले मात्र अझै प्रक्रिया पूरा गर्न नसकेर पछि परेको छ । खाता सञ्चालन नहुँदा कर्मचारीको तलबभत्ता वितरणदेखि विकास–निर्माणका गतिविधि समेत ठप्प बनेका छन् ।
स्थानीय तहले चालु आवको रकम खातामा माग गर्नुअघि गाउँसभाबाट नीति कार्यक्रम र बजेट पारित गरी पेश गर्नुपर्ने, प्रमुख वा अध्यक्षले प्रमुख प्रशासकीय अधिकृतलाई अख्तियारी दिनुपर्ने लगायत कानुनी प्रक्रिया पूरा नगरेसम्म खाता सञ्चालन गर्न नपाइने व्यवस्था छ । यसै कारण डुडुवाको खाता अवरुद्ध भएको नियन्त्रक कार्यालयले जनाएको छ ।
यसबीच, जेनजी आन्दोलनको क्रममा भाद्र २५ गते राति स्कुटीमा आएका व्यक्तिले कार्यालयमा आगजनी गरेपछि विवाद झन् चर्किएको छ । स्थानीयले कर्मचारी संलग्नताको आशंका गर्दै निष्पक्ष छानबिनको माग गरेका छन् । त्यही क्रममा गाउँपालिका अध्यक्षको कोठामा ताला लगाइएको छ । उनीहरुले आगजनी गर्न आएकाहरुले प्रयोग गरेको स्कुटी नम्बर सार्वजनिक भइसके पनि हल सम्म नियन्त्रणमा लिनु चिन्ताको बिषय भएको बताएका छन् ।
युवाहरुले कार्यालयभित्र लाखौं मुल्य बराबरको मदिरा र अवैध क्रियाकलापमा प्रयोग हुने सामग्री फेला परेको दाबी गर्दै स्वतन्त्र छानबिन र दोषीलाई कारबाही गर्न माग गरेका छन् । तर, गाउँपालिका अध्यक्ष नरेन्द्र चौधरीले पालिकालाई अनावश्यक रुपमा बदनाम गरिएको प्रतिक्रिया दिएका छन् ।
उनले भने, “प्रहरी, सेनाको उपस्थितिमा कानून विपरीत पालिकामा पसेर खानतलासी गर्ने अनि ताला लगाउने अधिकार कसलाई छ? यदि दुई दिनभित्र ताला खोलिएन भने पालिकाले कडा आन्दोलन गर्नेछ ।”
