काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्ड आजदेखि केही दिन एकान्तवासमा रहने भएका छन् ।
पार्टीको राष्ट्रिय सम्मेलनमा प्रस्तुत गर्ने दस्तावेज तयार पार्नका लागि प्रचण्ड एकान्तबास जान लागेका हुन् ।
निवास खुमलटार रहँदा नेता, कार्यकर्ताको भीडभाडले दस्तावेज तयार पार्ने काम अधुरै रहेको भन्दै प्रचण्ड काठमाडौं उपत्यका नजिकै जान लागेको खुमलटार स्रोतले जनाएको छ ।
सामान्यतः कुनै पनि गतिलो दस्तावेज तयार पार्न, अध्ययन गर्न र आराम गर्न प्रचण्ड हात्तीवन रिसोर्ट, सिन्धुपाल्चोकको सुकुने पुग्ने गर्छन् । यसपटक भने कहाँ जाने भन्नेबारे केही खुलाइएको छैन ।
सचिवालय स्रोतले भन्यो, ‘निवासमा नेताकार्यकर्ताहरूको भीडभाड हुने भएका कारण उहाँले पार्टीको राष्ट्रिय सम्मलनको बारेमा तयारी गर्न पाइएन भन्नुभएको छ । अबका दुई दिन उहाँ अध्ययनमा व्यस्त रहनुहुन्छ ।’
पुस ११ देखि १३ गतेसम्म काठमाडौंमा राष्ट्रिय सम्मेलनको तयारी गरिएको छ ।
