बाँके । नेपाल कम्युनिस्ट पार्टी माओवादी केन्द्र नेपालगञ्ज समितिले पार्टीका तर्फबाट निर्वाचित जनप्रतिनिधिलाई उत्तरदायी बनेर ‘जनतासँग जनप्रतिनिधि’ अभियान सञ्चालन गर्न निर्देशन दिएको छ ।
वडा तहमा पुगेर जनताका गुनासा सुन्न र विकास योजना तथा सेवा प्रवाहसम्बन्धी माग सुनवाइका लागि उक्त अभियान सुरु गरि जनप्रतिनिधि र जनताबीचको सम्बन्ध सुदृढ बनाउने तर्फ केन्द्रित हुन माओवादी केन्द्र बाँकेकि सदस्य मिना कुमारी मल्लले सुझाव दिनु भएको थियो । 
माओवादी केन्द्र नेपालगञ्ज समितिले आयोजना गरेको नवनिर्वाचित जनप्रतिनिधिहरुको सम्मान कार्यक्रमा बोल्ने वक्ताहरुले वडाबाट प्रवाह हुने सेवा सहज बनाएर अगाडि बढ्न सुझाव दिएका थिए ।
‘चुनावमा भोट माग्यौं, आश्वासन बाँड्यौं, चुनाव भएको पनि एक महिना बितिसक्यो तर जनतामा गुनासा र आक्रोश बढिरहेको छ,’ माओवादी केन्द्र लुम्बिनी प्रदेशका सदस्य नबिन शर्माले भने, ‘जनप्रतिनिधिलाई जिम्मेवार र उत्तरदायी भएर जनताको सेवामा लाग्ने वातावरण बनाउन पार्टीले अभियानमार्फत सहजीकरण गर्ने छ ।’
गाउँ नफर्केको, जनतालाई बिर्सेको, सुविधाभोगी भएको, चुनावी वाचाअनुसार काम नगरेको जस्ता आरोप जनप्रतिनिधिमाथि लाग्ने गरेको छ । जनताको पीर, मर्का बुझ्न र गुनासा सम्बोधनका लागि अभियानलाई प्रभावकारी रुपमा संचालन गर्न माओवादी केन्द्र लुम्बिनी प्रदेशका सहसचिव अक्कल बहादुर बमले बताए ।
नेपालगञ्ज समितिका अध्यक्ष रतन शाहीको अध्यक्षतामा भएको कार्यक्रममा नवनिर्वाचित जनप्रतिनिधिहरुलाई प्रमाणपत्र प्रदान गरेर सम्मान गरिएको थियो । उक्त कार्यक्रममा स्थानीय माओवादी नेताहरुको सहभागिता रहेको थियो ।
