बाँके १४ फागुन । ४४औँ राष्ट्रिय मगर एकता दिवसको अवसरमा बाँकेको जानकी गाउँपालिका र खजुरा गाउँपालिकाले शुक्रबार सार्वजनिक बिदा दिएका छन् ।
दुवै गाउँपालिकाले छुट्टाछुट्टै सूचना जारी गर्दै कार्यपालिका बैठकको निर्णयअनुसार मगर एकता दिवसका दिन बिदा दिने निर्णय गरिएको जनाएका छन् ।
पालिकाद्वारा जारी सूचनामा गाउँपालिकाका कार्यालय, मातहतका सम्पूर्ण कार्यालय, शिक्षण संस्था, स्वास्थ्य संस्था तथा अन्य सार्वजनिक सङ्घ–संस्थाहरूमा अत्यावश्यक सेवा बाहेकका सम्पूर्ण सेवा बन्द रहने उल्लेख गरिएको छ ।
जानकी गाउँपालिकाका अध्यक्ष छब्बन खाँ र प्रमुख प्रशासकीय अधिकृत परसुराम उपाध्यायद्वारा संयुक्त रूपमा जारी सूचनामा मगर समुदायको पहिचान, संस्कृति र योगदानको उच्च सम्मान गर्दै सम्पूर्ण मगर समुदायमा शुभकामना व्यक्त गरिएको छ ।
यस्तै खजुरा गाउँपालिकाका प्रमुख प्रशासकीय अधिकृत दिल बहादुरले जारी गरेको सूचनामा पनि मगर एकता दिवसले सामाजिक सद्भाव, सांस्कृतिक संरक्षण र समुदायबीच एकताको भावना सुदृढ बनाउने विश्वास व्यक्त गरिएको छ ।
स्थानीय तहले दिएको बिदासँगै शुक्रबार पालिकास्तरका अधिकांश नियमित सेवा बन्द रहनेछन् भने स्वास्थ्यलगायतका अत्यावश्यक सेवा भने यथावत सञ्चालन हुने जनाइएको छ ।
