बाँके । अन्तर्राष्ट्रिय मातृभाषा दिवसको अवसरमा शनिबार नेपालगञ्जमा साहित्यिक गोष्ठि सम्पन्न भएको छ। अवधी संस्कृतिक प्रतिष्ठानको आयोजना तथा विश्व हिन्दी महासभा नेपालको सहयोगमा कार्यक्रम सम्पन्न भएको हो ।
गोष्ठिमा मधेशी आयोगका पूर्व सदस्य विजय कुमार गुप्ताले नेपालका सबै भाषाको प्रतिनिधित्वसहित गरिएको कविता वाचनले देशको सांस्कृतिक बहुलता र मौलिक पहिचान उजागर गरेको बताउनुभयो । उहाँले संसारभर छरिएका नेपालीहरूले आफ्नो भाषा, साहित्य र संस्कृतिको विस्तार गरिरहेको उल्लेख गर्दै यस्ता बहुभाषिक प्रयासले नेपाललाई समान रूपमा समृद्ध बनाउन सक्ने धारणा राख्नुभयो ।
विश्व हिन्दी महासभाका केन्द्रीय सदस्य जगत तिमिल्सिनाले भाषा, संस्कृति र साहित्य जोगाउन सके मात्र सभ्यता र इतिहास सुरक्षित रहने बताउनुभयो । उहाँले जहाँ भए पनि नेपालप्रतिको माया र मातृभाषाप्रतिको प्रेम कहिल्यै कम नहुने जिकिर गर्नुभयो ।
नेपाल हज समितिका पुर्व सदस्य मेराज अहमद हिमालले नेपाल बहुभाषिक देश भएकाले सबै भाषाको समान हैसियत कायम राख्न यस्ता कार्यक्रमहरू महत्वपूर्ण हुने बताउनुभयो। कार्यक्रममा नेपाली, विभिन्न मातृभाषा र हिन्दी गरी एक दर्जन बढी कविहरूले आ–आफ्ना कविता वाचन गरेका थिए ।
अवधी संस्कृतिक प्रतिष्ठानका अध्यक्ष विष्णु लाल कुमालले अवधी जनजनको भाषा भएको उल्लेख गर्दै यसको संरक्षण, संवर्द्धन र विकासमा राज्यले विशेष ध्यान दिनुपर्नेमा जोड दिनुभयो । उहाँले वर्तमान संघीय संरचनामा सरकारी कामकाजको भाषाका रूपमा अवधीलाई मान्यता दिनुपर्ने आवश्यकता औंल्याउनुभयो ।
कार्यक्रममा पत्रकार मोहम्मद आरिफ अन्सारी, पवन जैयसवाल, जिनुहक हल्वाइ, सैयद असफाक रसुल हासमी, रेखा गुप्ता, सुशिला बैश्य, अनिता लामिछाने, कल्पना पौडेल, सहिदा शाह लगायतले कविता वाचन गरी मातृभाषाप्रतिको प्रेम र प्रतिबद्धता व्यक्त गर्नु भएको थियो ।
