बाँके । बाँकेका ८ वटै स्थानीय तहमा उम्मेदवारले सोमबार उत्साहजनक रुपले मनोनयन दर्ता गराएका छन् । सबैभन्दा चासोका साथ हेरिएको नेपालगन्ज उपमहानगरपालिकामा करिव दुई दर्जन उम्मेदवारले प्रमुख र उपप्रमुख पदमा मनोनयन दर्ता गराएको मुख्य निर्वाचन अधिकृतको कार्यालयले जनाएको छ ।
गठबन्धनका तर्फबाट नगर प्रमुखमा नेपाली कांग्रेसका प्रशान्त विष्ट र उपप्रमुखमा जनता समाजवादी पार्टी (जसपा)का तर्फबाट कमरुद्धिन राईले मनोनयन दर्ता गराएका छन् । यस्तै नेकपा एमालेको तर्फबाट नगर प्रमुखमा पशुपति दयाल मिश्र र उपप्रमुखमा शान्ति ढकालले दर्ता गराएका छन् ।
गठबन्धनमा रहेको नेकपा माओबादी केन्द्रका टंक धामीले प्रमुख र तारा रोकायले उपप्रमुख पदमा स्वतन्त्र रुपमा मनोनयन दर्ता गराए । राप्रपाको तर्फबाट आइतबार नै प्रमुखमा नन्दलाल बैश्य र उपप्रमुखमा बिन्दु चर्तिमगरले मनोनयन दर्ता गराएका थिए । मनोनयन दर्ता गर्ने क्रममा उम्मेदवारले आफ्नो शक्ति प्रर्दशन गरे ।
बाँकेको ८ वटै स्थानीय तहमा सोमबार कांग्रेस, एमाले, माओबादी केन्द्र लगायत दल तथा स्वतन्त्र उम्मेदवारले मनोनयन दर्ता गराएको जिल्ला निर्वाचन अधिकारी रमा पन्तले जानकारी दिईन ।
स्थानीय तह निर्वाचनका लागि मनोनयनको आज दोस्रो दिन बाँकेको नरैनापुर गाँउपालिकाका लागि ४ जनाले अध्यक्ष पदका लागि मनोनयन दर्ता गरेका छन् । 
नरैनापुर गाँउपालिकामा स्थापना गरिएको निर्वाचन अधिकृतको कार्यालयमा ५ जनाले उपाध्यक्षमा उम्मेदवारी दर्ता गराएका हुन् ।
उम्मेदवारी दर्ता गराए पश्चात पत्रकारहरु संग कुरा गर्दै नरैनापुर गाँउपालिका अध्यक्ष इस्तियाक अहमद शाहले गत निर्वाचनमा जनताले जुन विश्वासका साथ मत दिएका थिए त्यो भन्दा बढी काम गरेर देखाएको बताउदै आउने ३० गते हुने निर्वाचनमा दोब्बर मत दिएर जिताउने दाबी गरे । उनले भने बाँकी रहेको विकास निमार्णको काम यस पटक सम्पन्न गरेर अर्को पटक नयाँ व्यक्ति गाँउपालिकाको जिम्मेवारी प्रदान गर्ने घोषणा गरे ।
यसै गरी डुडुवा गाँउपालिकामा पनि ४ जनाले उम्मेदवारी दर्ता गराएका छन् । गाँउपालिकाका निर्वतमान अध्यक्ष नरेन्द्र चौधरीले आफूले जनताको भावना अनुसार काम गरेकोले एक कार्यकालका लागि जनताले आफनो मत दिएर विजय गराउने दाबी गरे ।
