बाँके । पुसको सुरुवातसँगै बाँकेका बस्तीहरू बिहानैदेखि बाक्लो हुस्सु र शीतलहरले ढाकिन थालेका छन् । घाम नलाग्ने दिनहरू, चिसो हावाको सिरेटो र रात–बिहान बढ्दो जाडोले गरिब, वृद्ध, अपाङ्ग तथा असहाय नागरिकको दैनिकी झन् कष्टकर बनेको छ । यही कठिन समयलाई ध्यानमा राख्दै बाँकेको जानकी गाउँपालिकाले चिसोबाट जोगाउने उद्देश्यसहित न्यानोपनको सहारा बनेको कार्यक्रम अघि सारेको छ ।
गाउँपालिकाको वातावरण तथा विपद् व्यवस्थापन शाखा मार्फत आज शुक्रबार करिब आठ सय थान न्यानो कम्बल वितरण गरिएको छ । पुस लाग्नासाथ जाडो असामान्य रूपमा बढेपछि जोखिममा परेका नागरिकलाई तत्काल राहत पु¥याउने लक्ष्यसहित कार्यक्रम सञ्चालन गरिएको जिन्सी शाखा प्रमुख राजु यादवले जानकारी दिनुभयो । उहाँका अनुसार यो वितरण सामान्य सहयोग मात्र नभई चिसोबाट ज्यान जोगाउने उपायका रूपमा लिइएको हो ।
गाउँपालिकाका अध्यक्ष छब्बन खाँले यस वर्ष जाडो चाँडै र तीव्र रूपमा बढेकाले ६५ वर्ष माथिका जेष्ठ नागरिक, सुत्केरी तथा गर्भवती महिला, अपाङ्गता भएका व्यक्ति र अति विपन्न परिवारलाई प्राथमिकतामा राखेर कम्बल वितरण गरिएको बताउनुभयो । कम्बल वितरण कार्यक्रममा बोल्दै अध्यक्ष खाँले स्थानीय सरकारले नागरिकको दुःख–सुखमा साथ दिनु नै जनप्रतिनिधिको धर्म भएको उल्लेख गर्नुभयो । “चिसोले कसैको जीवन जोखिममा नपरोस् भन्ने हाम्रो चाहना हो,” उहाँको भनाइ थियो ।
कार्यक्रमका प्रमुख अतिथि तथा नेपाली कांग्रेसका महाधिवेशन प्रतिनिधि लक्ष्मी नारायण शाहले जाडो बढेको वर्तमान अवस्थामा यस्ता वितरणमुखी कार्यक्रम अझ प्रभावकारी रूपमा अघि बढाउन सुझाव दिनुभयो । उहाँले केवल कम्बलमै सीमित नभई बिहान खानाको व्यवस्था नहुने नागरिकको पहिचान गरी खाना र न्यानो कपडा समेत उपलब्ध गराउन सके मानवीय पक्ष अझ सशक्त हुने धारणा राख्नुभयो । गरिबीको रेखामुनि रहेका नागरिकलाई गरिएको यो सहयोगले उनीहरूको अनुहारमा मुस्कान ल्याएको उल्लेख गर्दै उहाँले लोकतन्त्रको सुन्दर पक्ष यही भएको औँल्याउनुभयो ।
वडा नम्बर ५ का अध्यक्ष तथा गाउँपालिकाका प्रवक्ता टिकानाथ यादवले चिसोको मारमा परेका नागरिकलाई राहत दिनु स्थानीय सरकारको दायित्व भएको बताउनुभयो । सूचना प्रविधि अधिकृत विकास जिसीले पारदर्शी ढंगले वास्तविक लाभग्राहीको पहिचान गरी सहयोग वितरण गरिएको जानकारी दिनुभयो ।
कम्बल हातमा लिएर घर फर्किँदै गर्दा मानपुरकी वृद्धा सुदारा कुम्हारीनको आँखामा राहत झल्किन्थ्यो । “यो जाडोमा कम्बलले धेरै सहारा भयो,” उहाँको साधारण भनाइले कार्यक्रमको महत्व बोलिरहेको थियो । शिवशंकरले पनि कम्बल वितरणले आफूजस्ता गरिबलाई ठूलो राहत पुगेको भन्दै गाउँपालिकाप्रति आभार व्यक्त गर्नुभयो । अर्का वृद्ध दुखीरामले जाडोमा न्यानो कपडा नहुँदा भोग्नुपरेको पीडा स्मरण गर्दै अहिले पाएको सहयोगले रात काट्न सजिलो हुने बताउनुभयो । 
वातावरण तथा विपद् व्यवस्थापन शाखाका प्रमुख राजेन्द्र बजपाईले शीतलहरबाट जोगिन गाउँपालिकाले रणनीतिक रूपमा काम गरिरहेको जानकारी दिनुभयो । उहाँका अनुसार वडाका स्वास्थ्य चौकी, प्रहरी चौकी, सार्वजनिक स्थल लगायत महत्वपूर्ण स्थानमा दाउरा वितरण गर्नसमेत सुरु गरिएको छ, ताकि सेवामा खटिने र आवत–जावत गर्ने नागरिकले चिसोको सामना गर्न सकोस् ।
शीतलहरले कठोर बनेको यो मौसममा जानकी गाउँपालिकाले सुरु गरेको कम्बल वितरण कार्यक्रम केवल राहतको माध्यम मात्र होइन, स्थानीय सरकार नागरिकप्रति कति संवेदनशील छ भन्ने उदाहरण पनि बनेको छ । जाडोको कठोरताबीच न्यानोपन बाँड्ने यस्ता प्रयासले असहाय नागरिकको जीवनमा केही सहजता थपेको छ । कम्बल बितरण कार्यक्रममा कार्यपालिका सदस्य राम अचल धोबी, प्रशासकिय अधिकृत एंव सूचना अधिकारी शोभा पौडेल, गाँउपालिका अध्यक्षका प्रमुख स्वकीय सचिव सोराभ अलि इद्रीसी लगायत कर्मचारीहरुको सहभागिता रहेको थियो । 
