काठमाडौं । अमेरिकी सहायता परियोजना एमसीसी सम्झौताविरुद्ध प्रदर्शनमा उत्रेका १३७ जना पक्राउ परेका छन् ।
काठमाडौं प्रहरी प्रमुख एसएसपी सुदिप गिरीका अनुसार उनीहरु काठमाडौं उपत्यका विभिन्न ठाउँबाट पक्राउ परेका हुन् । पक्राउ परेकाहरुलाई नगर प्रहरी कार्यालय, भृकुटीमण्डसहित विभिन्न प्रहरी कार्यालयमा राखिएको छ ।
बुधबार राप्रपाका २१ भ्रातृ संगठन, अन्य ६ दल, माओवादी केन्द्रको भ्रातृ संगठनसहितले संसद भवन स्थल बानेश्वर क्षेत्रमा प्रदर्शन गरेका थिए ।
बानेश्वर क्षेत्रमा प्रदर्शनकारी र प्रहरीबीच झडपसमेत भएको छ । प्रदर्शनकारीले ढुंगामुडा गरेपछि प्रहरीले पानीको फोहरा र अश्रुग्यास प्रहार गरेको छ । भीडलाई तितरवितर पार्दै विभिन्न व्यक्तिलाई पक्राउ गरेको हो ।
यसै गरी बाँकेको नेपालगञ्जमा राप्रपाले एमसिसिका बिरुद्ध बिरोध प्रदर्शन गरेको थियो । प्रदर्शनमा राप्रपा युवा तथा एंव नेपालगञ्ज उपमहानगरपालिका वडा नं ४ का अध्यक्ष मोहम्मद सफिक बेहना, रबि बर्मा, इन्दिरा शाही लगायतका नेताहरुले एमसिसि पास गर्न पाइदैन, नेपाल सरकार मुर्दावाद लगायतका नाराहरु लगाउदै प्रदर्शन गरेका थिए ।
