काठमाडौँ । प्रत्येक वर्ष कार्तिक कृष्ण त्रयोदशीका दिन मनाइने काग तिहार पर्व आज देशभर विभिन्न धार्मिक विधिपूर्वक मनाइँदैछ ।
आजका दिन यमराजका दूतका रूपमा कागलाई मनपर्ने खानेकुरा चढाएर पूजा–आराधना गर्ने चलन छ । कागले यमराजसमक्ष राम्रो सन्देश पुर्याओस् भन्ने विश्वासका साथ भक्तजनले बिहानै कागलाई दही, भात, रोटी लगायतका मीठा परिकार खुवाउने परम्परा रहेको छ ।
नेपाल पञ्चाङ्ग निर्णायक विकास समितिका अध्यक्ष प्रा. शम्भुप्रसाद ढकालका अनुसार शास्त्रअनुसार त्रयोदशी तिथि सूर्योदयमा परेका कारण आज आइतबार काग तिहार मनाउनुपर्ने निर्णय गरिएको हो ।
यस अवसरमा काठमाडौंको कागेश्वरी मनोहरा नगरपालिका–१ स्थित कागेश्वरी महादेव मन्दिरमा विशेष पूजाआराधना हुने परम्परा छ । त्यस्तै, हनुमानढोकास्थित कागेश्वरी मन्दिरमा पनि कागको विशेष पूजा गरिन्छ । सो मन्दिरमा कागको ठूलो मूर्ति स्थापना गरिएको छ ।
यसैबीच, यमयातनाबाट मुक्ति पाउने धार्मिक विश्वाससहित शनिबार साँझदेखि नै यम दीपदान गर्ने क्रम सुरु भइसकेको छ । वैदिक सनातन परम्परा अनुसार दीप दक्षिणतर्फ फर्काएर बाल्ने चलन छ ।
तिथिको घटबढका कारण यस वर्ष कार्तिक कृष्ण त्रयोदशी साँझ परेकै दिनदेखि यमपञ्चक पर्व सुरु भएको हो । शनिबार नै लक्ष्मी स्थिर रहोस् भन्ने कामनासहित गरगहना र तामाका भाँडाकुँडा किन्ने धनतेरस पर्व पनि मनाइएको थियो ।
