काठमाडौं । नेकपा माओवादी केन्द्रको स्थायी समिति सदस्य तथा केन्द्रीय सचिवालय इञ्चार्ज वर्षमान पुन अनन्त राष्ट्रिय सम्मेलनअघि नै स्वदेश फर्कने भएका छन् ।
चीनको सेनजेनस्थित थर्ड पिपुल्स हस्पिटल अफ सेनजेनमा उपचाररत पुन यसै हप्ता काठमाडौं फर्कन लागेका हुन् । माओवादी केन्द्रको राष्ट्रिय सम्मेलन पुस ११–१३ गते काठमाडौंमा हुँदैछ ।
स्वास्थ्यमा सुधार भएको र यसै हप्ता अनन्त फर्कने कार्यक्रम रहेको उनका सचिवालय सदस्य सन्तोष पुनले जानकारी दिए । फर्कने मिति भने तय भइसकेको छैन ।
लाखौँमा केही जनालाई देखिने जटिल प्रकारको जण्डिसको उपचारका लागि अनन्त १३ असोजमा बैंकक पुगेका थिए । त्यहाँस्थित समितिभेज अस्पतालमा उपचारबाट सुधार नभएपछि पुनलाई १० मंसिरमा चीन लगेर थर्ड पिपुल्स हस्पिटल अफ सेनजेनमा भर्ना गरिएको थियो ।
उक्त अस्पतालमा उपचार सुरु भएको केही दिनमै उनको स्वास्थ्यमा उल्लेखनीय सुधार भएको थियो। चीनमा उनको उपचारका लागि अध्यक्ष पुष्पकमल दाहाल प्रचण्डले पहल गरेका थिए ।
