बाँके । मानव अधिकारवादी संस्था मानव अधिकार संरक्षण तथा प्रवर्द्धन केन्द्र (हुरीपप) ले शुक्रबार एक बिज्ञप्ति जारी गर्दै निर्वाचन आयोगले जारी गरेको निर्वाचन आचारसंहिता विपरित बाँके र कपिलबस्तुमा केही राजनितिक दलहरुले निर्वाचन प्रचारप्रसारमा बालबालिकाको प्रयोग गरेको पाइएकोले गम्भीर ध्यानाकर्षण भएको जनाएको छ ।
हुरीपपका केन्द्रीय अध्यक्ष आलम खानले स्थानीय निर्वाचनको प्रचार प्रसारमा बालबालिकालाई सडकमा उतार्नु बाल अधिकार विपरित भएको भन्दै त्यस्तो नगर्न अपिल गरेको छ ।
बैशाख ३० गते हुने स्थानीय निर्वाचनको प्रचार प्रसारका लागि बाँकेको खजुरामा नेकपा एमाले, नेपालगञ्ज १७ मा जनता समाजवादी पार्टी, नेपालगञ्ज २ मा राप्रपा नेपाल र कपिलवस्तुको माया देवी गाउँपालिकामा बालबालिकालाई सहभागी गराइएकोप्रति हुरीपपले विज्ञप्ती निकालेर विरोध जनाएको हो। 
बालबालिका तथा किशोर किशोरी (१८ वर्षमुनिका) लाई चुनावको कुनै पनि प्रक्रिया (प्रचारप्रसार गर्ने, भोट माग्ने र र्याली) मा समावेश नगर्न आग्रह गरिएको छ । निर्वाचन आयोगद्वारा जारी ‘निर्वाचन आचारसंहिता, २०७८’ को पूर्ण पालना सुनिश्चित गरिनुपर्ने बिज्ञप्तिमा भनिएको छ । 
हुरीपपले राजनीतिक अभिष्ट पूरा गर्ने उद्देश्यका साथ अवोध बालबालिकाहरुको प्रयोग हुनु अत्यन्त दुःखद भएको बताएको छ। हुरीपपले बालबालिकाको प्रयोग गर्नेमाथि कारबाही गर्न निर्वाचन आयोगलाई आग्रह पनि गरेको छ।
