बाँके । बाँकेको नरैनापुर गाउँपालिकामा करदाता सेवा केन्द्र सञ्चालनमा आएपछि पहिलोपटक व्यावसायिक स्थायी लेखा नम्बर (प्यान) प्रमाणपत्र जारी गरिएको छ।
नरैनापुर गाउँपालिकाका प्रमुख प्रशासकीय अधिकृत नवराज वलीका अनुसार करदाता सेवा केन्द्रमार्फत गाउँपालिकामा औपचारिक रूपमा कर सेवा सुरु भएको हो ।
सेवा शुभारम्भसँगै गाउँपालिका–२, बेउचहवास्थित मदिना परफ्युम एण्ड जनरल स्टोरकी सञ्चालक जन्नतुल पठानिनलाई पहिलो व्यावसायिक प्यान प्रमाणपत्र हस्तान्तरण गरिएको छ ।
गाउँपालिकाका प्रमुख प्रशासकीय अधिकृत वली र करदाता सेवा केन्द्रका शाखा प्रमुख मुकद्दर अली मुकेरीले संयुक्त रूपमा प्रमाणपत्र हस्तान्तरण गर्नुभएको थियो ।
गाउँपालिकामै करदाता सेवा केन्द्र सञ्चालन भएपछि व्यावसायिक प्यान लिन तथा करसम्बन्धी सेवा प्राप्त गर्न अन्यत्र जानुपर्ने बाध्यता कम हुने गाउँपालिका अध्यक्ष इश्तियाक अहमद शाहले बताउनुभयो । यसबाट स्थानीय व्यवसायीलाई कर प्रणालीमा आबद्ध हुन सहज हुनुका साथै व्यवसायको औपचारिकता र कर प्रशासनको पहुँच विस्तारमा सहयोग पुग्ने विश्वास गरिएको छ।
