काठमाडौं । अमेरिकी मिलेनियम च्यालेञ्ज कर्पोरेशन (एमसीसी) जसरी पनि संसदबाट पारित गर्ने प्रधानमन्त्री शेरबहादुर देउवाको अडानपछि सत्ता गठबन्धनमा विवाद बढेको छ ।
एमसीसी पारित गरेरै अघि बढ्ने अडानमा प्रधानमन्त्री देउवा देखिएपछि सत्तारुढ गठबन्धनमा रहेका नेकपा माओवादी केन्द्र र नेकपा एकीकृत समाजवादीले त्यसको सशक्त प्रतिवाद गरिरहेका छन् ।
अहिलेकै अवस्थामा एमसीसी अगाडि बढाउन नहुने पक्षमा माओवादी केन्द्र र नेकपा एस छ । त्यसैले पनि एमसीसी पारित गर्ने अवस्था आएमा सत्ता गठबन्धनमा नयाँ समीकरण हुने स्थिति देखिएको छ । माओवादी केन्द्र र नेकपा एसले सरकार छाड्ने स्थिति बन्ने देखिएको छ ।
नेकपा माओवादी केन्द्रका नेता नारायणकाजी श्रेष्ठले जवर्जस्ती एमसीसी पारित गर्न खोजिए आफूहरु सत्ता गठबन्धन छाड्ने बताइसकेका छन् । त्यस्तै, नेकपा एसका नेता झलनाथ खनालले पनि एमसीसी पास गर्न प्रधानमन्त्रीले जवर्जस्ती गरे सत्ता गठबन्धन टुट्ने संकेत गरिसकेका छन् ।
प्रधानमन्त्री देउवाले भने तत्काल एमसीसी पारित गरेर अघि बढ्नुपर्ने स्थिति आएको बताएका छन् । सत्ता गठबन्धनको बैठकमा पनि प्रधानमन्त्री देउवाले एमसीसी पारित गरेर अघि बढ्ने बताएका छन् ।
अहिलेकै स्थितिमा एमसीसी पारित गराउनका लागि कांग्रेस तथा प्रधानमन्त्री देउवाको तर्फबाट पूर्णबहादुर खड्का र सञ्चारमन्त्री ज्ञानेन्द्रबहादुर कार्की माओवादी केन्द्र अध्यक्ष पुष्पकमल दाहाल प्रचण्ड र नेकपा एसका अध्यक्ष माधवकुमार नेपाललाई बारम्बार भेट गरी सहमतिको विन्दू खोजिरहेका छन् ।
नेता खड्का र कार्की प्रचण्ड र नेपालका साथै अन्य गठबन्धनका साझेदार दलहरुसित आपसी परामर्श गरिरहेका छन् । प्रचण्ड र नेपालले भने अहिलेको अवस्थामा एमसीसी पारित गरेर सहकार्य अघि बढ्न नसक्ने जनाउ दिइसकेका छन् ।
सत्ता साझेदार दलहरुमध्ये जनता समाजवादी पार्टीले भने यसअघि नै एमसीसी पारित गरेर अघि बढ्ने बताइसकेका छन् । जनमोर्चाले भने एमसीसीको विपक्षमा रहेको बताउँदै आएका छन् ।
प्रधानमन्त्री शेरबहादुर देउवा भने सत्ता गठबन्धन टुटाएर भएपनि एमसीसी पारित गराउन लागिपरेका छन् । त्यसका लागि देउवाले एमालेको साथ खोजिरहेका छन् ।
