काठमाडौं । हजयात्राका लागि साउदी अरबको मक्का मदिना गएकी एक नेपालीको अत्यधिक गर्मीका कारण मृत्यु भएको छ । साउदीस्थित महावाणिज्यदूतावासका अनुसार बाँकेकी सायर बानु सैयदको मृत्यु भएको हो ।
मुस्लिम समुदायको पवित्र तीर्थयात्रा साउदी अरबको मक्कासम्मको हजका क्रममा यस वर्ष ५६२ तीर्थयात्रीको मृत्यु भएको छ । केही तीर्थयात्री अझै बेपत्ता रहेको र केहीको उपचार भइरहेकाले मृतकको संख्या बढ्न सक्ने अन्तर्राष्ट्रिय सञ्चारमाध्यमले जनाएका छन् ।
मक्कामा ५१.८ डिग्री सेल्सियससम्मको तापक्रम रहेको र हिट स्ट्रोक तथा गर्मीजन्य अन्य कारणले धेरै तीर्थयात्रीले ज्यान गुमाउनुपरेको रोयटर्सले जनाएको छ । चरम गर्मी, शारीरिक थकान, ठूलो जमघटलगायत कारण हजयात्रामा जोखिम थपेको जनाइएको छ ।
इजिप्टले हजयात्रामा गएका आफ्ना ३ सय ७ नागरिकको मृत्यु भएको र ११८ जना हराइरहेको जनाएको छ । यस्तै ६८ जना भारतीय, १६५ जना इन्डोनेसियाली, जोर्डनका ४१, ट्युनिसियाका ३५ र इरानका ११ नागरिकले हजका क्रममा ज्यान गुमाएका छन् ।
साउदी अधिकारीहरुले पर्याप्त पानी पिउन, छाता ओढ्न तथा दिउँसोको समयमा बाहिर ननिस्कन हजयात्रीहरुलाई सचेत गराएका छन् । हजयात्रीलाई आवश्यक सहयोग गर्न ठूलो संख्यामा चिकित्सकीय टोली र स्वयंसेवक खटाइएको हज अधिकारीहरुले बताएका छन् । गर्मी छल्न कुलिङ सेन्टर, हाइड्रेसन प्वाइन्ट, पानीको फोहरालगायतको व्यवस्था गरिएको जनाइएको छ ।
यस वर्षको हजयात्राका लागि विश्वभरका १८ लाखभन्दा बढी इस्लाम धर्मावलम्बी मक्का पुगेको साउदीका अधिकारीहरुले जनाएका छन् । नेपालबाट पनि बर्सेनि सयौं मानिस हजयात्रामा जाने गर्छन् । अघिल्लो शुक्रबार अर्थात् जुन १४ मा सुरु भएको हजयात्रा बुधबार अर्थात् जुन १९ मा सकिएको छ । इस्लामिक क्यालेन्डरका आधारमा हजको मिति तय गरिन्छ ।
