काठमाडौं । नेकपा एमालेको ११औँ महाधिवेशनको बन्द सत्रअन्तर्गत आज केन्द्रीय समितिका लागि उम्मेदवारहरूको दरखास्त फारम वितरण, उम्मेदवारी मनोनयन तथा अन्तिम नामावली प्रकाशन हुने भएको छ।
नयाँ नेतृत्व चयन प्रक्रियाअन्तर्गत निर्वाचन समितिलाई दिइएको अधिकार अनुसार उम्मेदवारीका आकांक्षीहरूले आज बिहान १०:३० बजेदेखि दिउँसो १:३० बजेसम्म दरखास्त फारम दर्ता गर्न सक्ने कार्यतालिका छ। यसअघि केन्द्रीय निर्वाचन आयोगले बिहान १०:१५ बजे अन्तिम मतदाता नामावली प्रकाशन गर्नेछ।
दिउँसो २:३० बजे उम्मेदवारहरूको प्रारम्भिक नामावली प्रकाशन गरिनेछ। त्यसपछि उम्मेदवारविरुद्ध उजुरी दिन दिउँसो २:३० बजेदेखि ३ बजेसम्मको समय तोकिएको छ। सबै प्रक्रिया पूरा भएपछि साँझ ६ बजे उम्मेदवारहरूको अन्तिम नामावली सार्वजनिक गरिने निर्वाचन समितिले जनाएको छ।
महाधिवेशनअन्तर्गत भोलि (मंगलबार) बिहान ११ बजेदेखि साँझ ५ बजेसम्म मतदान हुने कार्यतालिका तय गरिएको छ।
शनिबार भक्तपुरको सल्लाघारीमा उद्घाटन सत्र सम्पन्न भएको महाधिवेशनको बन्द सत्र आइतबारदेखि काठमाडौंको भृकुटीमण्डपमा सञ्चालन भइरहेको छ।
