काठमाडौं । सरकारले कारबाही गर्ने भएपछि वायु सेवा सञ्चाकलहरू हवाई सेवा रोक्ने घोषणाबाट पछि हटेका छन् ।
नागरिक उड्डयन प्राधिकरण र नेपाल वायुसेवा सञ्चालक संघबीच उडान सञ्चालन गर्ने विषयमा मंगलबार मध्यराति सहमति भएको हो । अब बुधबार आन्तरिक उडान नियमित हुने भएको छ ।
राति ११ बजेसम्म चलेको वार्तामा वायुसेवाले आन्तरिक उडान बन्द नगर्ने र प्राधिकरणले पनि वायुसेवाका जायज माग सम्बोधन गर्ने भएपछि उडान नियमित गर्ने सहमति भएको हो ।
वायुसेवा सञ्चालक संघका प्रवक्ता योगराज शर्मा कँडेलका अनुसार आन्तरिक उडान खुला राखेर वार्तालाई निरन्तरता दिइने छ । छलफल बुधवार मध्याह्न १२ बजे प्राधिकरण केन्द्रीय कार्यालयमा हुनेछ ।
वायुसेवा सञ्चालक संघले मंगलबार पत्रकार सम्मेलन गरी बुधबारदेखि आन्तरिकतर्फका सबै उडान अनिश्चितकालका लागि ठप्प पार्ने घोषणा गरेको थियो ।
प्राधिकरणले पनि पत्रकार सम्मेलन गरी हवाइ उडान ठप्प पारे कारवाही गर्ने चेतावनी दिएको थियो ।
