काठमाडौं । बतास समूहले सस्कृति, पर्यटन तथा नागरिक उड्डयन मन्त्री प्रेमबहादुर आलेविरुद्ध सर्वोच्च अदालतमा मुद्दा दायर गर्ने तयारी गरेको छ । मन्त्रीबाट आफू अन्यायमा परेको भन्दै बतास समूह सर्वोच्च गुहार्न पुगेको हो ।
बतास फाउन्डेसनको नामबाट बुधबार मन्त्री आलेविरुद्ध रिट परेको भएपनि दर्ता गरिएको छैन । प्रधानन्यायाधीश चोलेन्द्र शम्शेर जबराका सञ्चार विज्ञ किशोर पौडेलका अनुसार उक्त रिटमाथि अहिले अध्ययन भइरहेको छ ।
बतास समूहले नारायणहिटी दरबार संग्रहालयमा क्याफ्टेरिया सञ्चालन गर्ने तयारी गरेको थियो । उक्त कार्यलाई मन्त्री आलेले रोकेका थिए । साथै, मन्त्री आलेले बतासले सञ्चालन गर्दै आएको पशुपतिस्थित धर्मशाला पनि सञ्चालनमा रोक लगाउने निर्णय गरेका थिए ।
केही दिनअघि मात्र बतास समूहले विज्ञप्ति जारी गर्दै मन्त्री आलेको निर्णयले आफूलाई करोडौँ रुपैयाँ घाटा भएको जनाएको थियो ।
