नेपालगञ्ज, कात्तिक १५ गते । बाँकेको जानकी गाउँपालिका–५, बकसपुरस्थित अम्बे स्टिल उद्योगमा विद्युत् भट्टी विस्फोट भएर आगलागी हुँदा आठ जना कामदार घाइते भएका छन् । घटना लगत्तै जानकी गाउँपालिका–५ का वडाध्यक्ष एवं गाउँपालिकाका प्रवक्ता टीकानाथ यादव उद्धारमा आफैँ खटिनुभएको थियो ।
आगलागीको खबर पाएलगत्तै घटनास्थल पुग्नुभएका यादवले घाइते कामदारलाई तत्काल उद्धार गरी उपचारका लागि भेरी अस्पताल नेपालगञ्ज पुर्याउन समन्वय तथा सहयोग गर्नुभएको थियो । दुर्घटनामा गम्भीर घाइते भएका दुई जनालाई थप उपचारका लागि भारतको लखनउ लगिएको छ भने अन्य छ जनाको भेरी अस्पतालमा उपचार भइरहेको छ ।
जिल्ला प्रहरी कार्यालय बाँकेका अनुसार आइतबार बिहान करिब ५ः४५ बजे उद्योगमा फलाम पगाल्न प्रयोग गरिने विद्युत् भट्टी विस्फोट भई आगलागी भएको थियो । उद्योगमा रहेका तीनवटा भट्टीमा विद्युत् सर्ट सर्किट भएपछि आगलागी भएको प्रारम्भिक जानकारी प्रहरीले दिएको छ । ती प्रत्येक भट्टीको क्षमता २५ टन रहेको छ ।
घाइतेमध्ये बाँकेको जानकी गाउँपालिका–५ का २८ वर्षीय शिवप्रसाद चमार, २२ वर्षीय रामदिन हरिजन, २४ वर्षीय प्रेम धोबी, २९ वर्षीय दिलीपकुमार यादव र ३५ वर्षीय लक्ष्मीराम यादव रहेका छन् । त्यसैगरी भारतको बहराइच जिल्लाका राजकुमार निषाद, नशिवकुमार निषाद र विनोदकुमार निषाद घाइते भएका छन् ।
गम्भीर घाइते शिवप्रसाद चमार र रामदिन हरिजनलाई थप उपचारका लागि भारतको लखनउ रिफर गरिएको जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतितसिंह राठौरले जानकारी दिनुभयो ।
आगलागी नियन्त्रणका लागि नेपालगञ्ज उपमहानगरपालिकाका दुई र कोहलपुर नगरपालिकाको एक गरी तीनवटा दमकल परिचालन गरिएको थियो । नेपाल प्रहरी, सशस्त्र प्रहरी बल तथा स्थानीयवासीको सहयोगमा बिहान करिब ८ः३० बजे आगो पूर्ण रूपमा नियन्त्रणमा लिइएको प्रहरीले जनाएको छ ।
आगलागीको सूचना प्राप्त हुनासाथ इलाका प्रहरी कार्यालय खजुरा खुर्दबाट प्रहरी वरिष्ठ नायब निरीक्षक लुद्रबहादुर केसीको कमान्डमा पाँच सदस्यीय प्रहरी टोली घटनास्थल पुगेको थियो ।
यसअघि पनि केही दिनअघि सोही उद्योगको केमिकल ट्याङ्कीमा आगलागी भएको थियो । छोटो अवधिमै उद्योगमा दोस्रो पटक आगलागी तथा विस्फोटको घटना भएपछि औद्योगिक सुरक्षा र कामदारको सुरक्षाबारे चासो बढेको छ ।
जिल्ला प्रहरी कार्यालय बाँकेले घटनाबारे थप अनुसन्धान भइरहेको जनाएको छ । आगलागीबाट उद्योगमा भएको भौतिक तथा आर्थिक क्षतिको विवरण आउन बाँकी रहेको छ ।
