बाँके । बाँकेको नरैनापुर गाउँपालिकाले विपद्का बेला उद्धार तथा राहत कार्यलाई प्रभावकारी बनाउन इलाका प्रहरी कार्यालय भगवानपुरलाई आवश्यक विपद् उद्धार सामग्री हस्तान्तरण गरेको छ ।
गाउँपालिकाको विपद् व्यवस्थापन शाखाका प्रमुख विनोद चौधरीले इलाका प्रहरी कार्यालय भगवानपुरका प्रहरी निरीक्षक सुरेश कोइरालालाई उक्त उद्धार सामग्री हस्तान्तरण गर्नुभएको हो ।
विपद्का घटना जुनसुकै बेला पनि आउन सक्ने भएकाले उद्धार कार्यमा खटिने सुरक्षाकर्मीलाई आवश्यक सामग्री उपलब्ध गराउने उद्देश्यले गाउँपालिकाले सामग्री हस्तान्तरण गरेको जनाएको छ। विपद्को समयमा तत्काल उद्धार तथा राहत कार्य सञ्चालन गर्न यस्ता सामग्रीले सुरक्षाकर्मीलाई थप सहजता पुग्ने अपेक्षा गरिएको छ।
सामग्री हस्तान्तरण कार्यक्रममा राष्ट्रिय स्वतन्त्र पार्टीका पालिका सचिव अरबिन्द कुमार यादव लगायतको उपस्थिति रहेको थियो ।
स्थानीय तह र सुरक्षा निकायबीचको सहकार्यलाई थप प्रभावकारी बनाउँदै विपद् व्यवस्थापन तथा उद्धार कार्यलाई व्यवस्थित र चुस्त बनाउन गाउँपालिकाले आगामी दिनमा समेत आवश्यक समन्वय र सहकार्यलाई निरन्तरता दिने जनाएको छ।
