बाँके । भेरी अस्पताल नेपालगञ्जमा फोक्सो तथा श्वासप्रश्वास रोग, सघन उपचार र निद्रा रोगसम्बन्धी विशेषज्ञ सेवा सुरु भएको छ । अस्पतालले आज मंगलबार देखि यी तीन विधामा विशेषज्ञ सेवा सञ्चालनमा ल्याएको हो ।
डा. रञ्जित पाण्डेद्वारा प्रदान गरिने उक्त विशेषज्ञ सेवाको अस्पताल विकास समितिका अध्यक्ष डा. लक्ष्मण सिग्देल, प्रमुख मेडिकल सुपरिन्टेन्डेन्ट डा. नवीन दर्नाल, प्रमुख कन्सल्टेन्ट डर्माटोलोजिस्ट डा. बद्री चापागाईं, वरिष्ठ कन्सल्टेन्ट फिजिसियन डा. राजन पाण्डे तथा नर्सिङ प्रमुख पदमा देवी देवकोटालगायतले संयुक्त रूपमा उद्घाटन गर्नुभएको थियो ।
अस्पतालका अनुसार उक्त सेवा ओपीडी–७ (ए) बाट प्रत्येक हप्ताको मंगलबार र बिहीबार उपलब्ध हुनेछ ।
नयाँ विशेषज्ञ सेवाबाट फोक्सो तथा श्वासप्रश्वाससम्बन्धी रोग, जटिल अवस्थाका बिरामीको सघन उपचार तथा निद्रासम्बन्धी समस्याको पहिचान, परीक्षण र उपचारमा सहजता हुने अपेक्षा गरिएको छ । यससँगै सम्बन्धित रोगका बिरामीले विशेषज्ञ परामर्श र उपचारका लागि अन्यत्र धाउनुपर्ने बाध्यता कम हुने विश्वास गरिएको छ ।
भेरी अस्पतालले विशेषज्ञ सेवाको विस्तारलाई प्राथमिकता दिँदै सर्वसाधारणलाई सहज, सुलभ र गुणस्तरीय स्वास्थ्य सेवा उपलब्ध गराउने उद्देश्यले विभिन्न उपचार विधिमा सेवा विस्तार गर्दै आएको छ ।
नयाँ विशेषज्ञ सेवाको सुरुवातले बाँकेसहित पश्चिम नेपालका बिरामीलाई फोक्सो, श्वासप्रश्वास तथा निद्रा रोगसम्बन्धी उपचारमा थप सुविधा पुग्ने अस्पताल बिकास समितिका सदस्य डा. डक्ट प्रसाद धितातले बताउनु भयो।
