बाँके । मुस्लिम र हिन्दू समुदायले आज सामूहिकरुपमा मोहर्रम पर्व मनाउँदैछन्। मुस्लिम पात्रो अनुसार हिजरी संवत् १४४५ को मोहर्रम महीनाको आज १० तारिखका दिन यो पर्व धुमधामका साथ बाँके सहित संसार भरि मनाइँदै छ।
मुस्लिमको पर्व भए पनि सदियौँदेखि यहाँका हिन्दूले समेत सँगसँगै मनाउने एकमात्र पर्व नै मोहर्रम भएकाले यो पर्व दुवै सम्प्रदायबीच धार्मिक सद्भाव कायम गर्न महत्वपूर्ण भूमिका खेलेको हिन्दु अगुवा रबि बर्माले बताए ।
मुस्लिम धार्मिक गुरु हजरत इमामे हुसैनको सम्झना स्वरुप मनाइने यो पर्वमा मुस्लिम धर्मगुरुको प्रतीकस्वरुप तहजियाको पूजा गर्ने प्रचलन रहेको छ।
धार्मिक सहिष्णुता र भाइचाराको सम्बन्ध कायम गर्न हिन्दू समुदायले समेत मोहर्रमका अवसरमा शुभकामना आदानप्रदान गरी मनाउने गरेका हुन् । यता मुस्लिम धर्मावलम्बी र हिन्दू धर्मावलम्बीले आज उत्साह साथ मनाउने मोहर्रमका लागि जिल्लामा कागजको मूर्ति तहजियाको बिक्री बढेको छ।
हिन्दू र मुस्लिम धर्मावलम्बीले मनाउने चाड भए पनि पछिल्लो समय हरेक समुदायले घरघरमा ताहजिया राखी चाड मनाउने गरेका छन्।
आजभन्दा एक हजार ४ सय ५० वर्ष अघि एजिदहरुले गरेको आक्रमणमा परी मारिएका इस्लामिक गुरु हजरत इमामे हुसैनको सम्झनामा तहजिया राखेर यो चाड मनाउने गरिएको छ ।
हुसैनको प्रतीकस्वरुप घरघरमा तहाजियाको पूजा गर्ने चलन रहेको छ ।
यता नरैनापुर गाउँपालिकाका अध्यक्ष शैयद इस्तियाक अहमद शाहले शान्तिपुर्ण तरिकाले पर्व मनाउन अपिल गर्नु भएको छ भने शान्ति सुरक्षा कडा पार्न नेपाल प्रहरी र जनपद प्रहरी संग आग्रह गर्नु भएको छ ।
