बाँके । बाँकेको राप्ती सोनारी–७ फत्तेपुरस्थित सहिद दलबहादुर घर्ति खेल मैदानमा बिहीबार उत्साह र उमङ्गले गुञ्जायमान बन्यो । न्यु जन परोपकारी युवा स्पोर्टस क्लबका खेलाडीहरूलाई ज्ञान नेपाल ले दुई थान फुटबल र दुई थान भलिबल हस्तान्तरण गरेपछि स्थानीय युवामा नयाँ जोश भरिएको छ ।
स्थानीय खेलकुदलाई प्रोत्साहन गर्ने उद्देश्यसहित गरिएको यो सहयोगले खेलाडीहरूमा ऊर्जा थपेको हो । सामग्री सहयोगी संस्था ज्ञान नेपालका उपाध्यक्ष डा. डक्ट प्रसाद धितालले भन्नुभयो, “युवाहरूको ऊर्जालाई खेलकुदतर्फ मोड्न सके समाजमा सकारात्मक परिवर्तन सम्भव छ । खेलले अनुशासन, सहकार्य र नेतृत्वको भावना विकास गर्छ, त्यसैले ज्ञान नेपाल सदैव युवाको साथमा रहनेछ ।”
डा. धितालले आगामी दिनमा खेल मैदानको सुदृढीकरण, खेल तालिम र प्रतियोगिता व्यवस्थापनमा पनि निरन्तर सहयोग गर्ने प्रतिवद्धता जनाउनुभयो ।
त्यसैगरी अधिकारकर्मी एवं पत्रकार आलम खानले भन्नुभयो, “ग्रामीण क्षेत्रमा खेलकुदको विकासका लागि यस्तो सहयोग प्रेरणादायी कदम हो । स्थानीय युवाको प्रतिभा निखार्नका लागि समुदाय र संस्थाको सहकार्य अत्यावश्यक छ ।”
खेल सामग्री प्राप्त गर्दै खेलाडी सुमिर पुनले भन्नुभयो,“यो सहयोगले हामीमा नयाँ आत्मविश्वास र जोश जागेको छ । अब हामी मैदानमा अझ उत्साहपूर्वक खेल्नेछौं र हाम्रो गाउँलाई जिल्लाभर चिनाउनेछौं ।”
सहिदको नाममा स्थापना गरिएको यो खेलमैदान स्थानीय युवाको अभिमान र सपनाको प्रतीक बन्दै गएको छ । ज्ञान नेपालको यो सकारात्मक पहलले ग्रामीण युवामा खेलकुदप्रतिको आकर्षण मात्र बढाएको छैन, सामाजिक परिवर्तनको नयाँ सम्भावनासमेत उजागर गरेको छ । 
