काठमाडौँ । राष्ट्रिय स्वतन्त्र पार्टी (रास्वपा) का तर्फबाट प्रतिनिधिसभा सदस्यका लागि समानुपातिक बन्दसूचीमा परेका डाक्टर सैयद वकार अहमद शाह अन्ततः संसदीय राजनीतिबाट बाहिरिएका छन्। पार्टीले टुङ्गो लगाएको अन्तिम समानुपातिक सूचीमा उनको नाम समावेश नभएपछि उनको संसदीय यात्रा यस चरणमा रोकिएको हो ।
बाँके जिल्लाको नरैनापुर स्थायी घर भएका डा. शाह लामो समयदेखि स्वास्थ्य सेवामा सक्रिय रहँदै आएका छन् । हाल उनी मोरङको विराटनगरमा अस्पताल सञ्चालन गर्दै बिरामीहरूको उपचारमा समर्पित छन् । सामाजिक सेवामा समेत सक्रिय रहेका शाहलाई यसअघि रास्वपाले समानुपातिक बन्दसूचीमा समेटेपछि सांसद बन्ने सम्भावनाका रूपमा हेरिएको थियो ।
तर पार्टीको अन्तिम निर्णयसँगै उनको नाम सूचीबाट बाहिरिएपछि संसदीय राजनीतिमा प्रवेश गर्ने उनको सम्भावना तत्कालका लागि टरेको छ। यद्यपि स्वास्थ्य क्षेत्रमार्फत समाजसेवामा निरन्तर सक्रिय रहेका शाहको योगदानलाई स्थानीय तहमा सकारात्मक रूपमा हेरिँदै आएको छ ।
राजनीतिक विश्लेषकहरूका अनुसार समानुपातिक सूची छनोट प्रक्रियामा पार्टीले विभिन्न क्षेत्र, समुदाय र प्रतिनिधित्वको सन्तुलन मिलाउनुपर्ने भएकाले अन्तिम सूचीमा धेरै नाम परिवर्तन हुने गरेका छन् ।
डा. शाह भने हाल स्वास्थ्य सेवामार्फत समाजमा योगदान पुर्याउने आफ्नो अभियानलाई निरन्तरता दिइरहेका छन् ।
