काठमाडौं । उपप्रधान तथा गृहमन्त्री नारायणकाजी श्रेष्ठले ईपीएस कार्यालयका प्रतिनिधिको गैरजिम्मेवार प्रवृत्तिले बालकुमारी घटना घटेको बताएका छन् ।
सोमबार संसद्को राज्यव्यवस्था तथा सुशासन समितिको बैठकमा भएको छलफलमा बोल्दै उनले ईपीएस कार्यालयका प्रतिनिधिको गैरजिम्मेवार प्रवृत्ति उपयुक्त नभएको बताए ।
उनले भने, ‘केही दिनदेखि बालकुमारीमा असन्तुष्ट युवाहरुले गरिरहेको प्रदर्शनको विषयमा आफूले घटना हुनुभन्दा अघि ईपीएस शाखा प्रमुख गुरुदत्त सुवेदीलाई बोलाएर जानकारी लिएको थिए । तर, उहाँले केही हुँदैन ३ बजेसम्म बसेर जान्छन् भनेर हल्का जवाफ दिनुभयो, यो हामीलाई चित्त बुझेको छैन ।’
उनले बालकुमारीमा प्रदर्शन भइरहेको ठाउँमा मन्त्रीको गाडी लगिएको विषयमा पनि असन्तुष्टि जनाए। ‘पीएसओ र बडिगार्डले मन्त्रीको गाडीलाई त्यहाँ जानबाट किन नरोकेको होला ? जसरी हुन्छ ईपीएसमा दुर्घटना हुन नदिने कुरा भएको थियो । मन्त्रीजीको गाडी त्यहाँ आइसकेपछि उहाँ बाहिर निस्केर सवाल जवाफमा पनि लाग्नुभएछ, धकेलाधकेल पनि भएछ’, घटनाबारे ब्रिफिङ गर्दै गृहमन्त्री श्रेष्ठले भने ।
उनले भौतिक योजना मन्त्री प्रदर्शनकारीबाट घेराबन्दीमा परेपछि फिल्ड कमान्डर त्यो दिशातिर जान खोजेको र गोली प्रहार भएको बताए । ‘त्यही क्रममा सुरक्षाकर्मीले गोली चलाएको देखिन्छ,’ उनको भनाई थियो ।
