बाँके । बाँके निर्वाचन क्षेत्र नं. २ मा राजनीतिक समीकरण फेरिएको छ। जनता समाजवादी पार्टी (जसपा) नेपालका प्रभावशाली नेता मोहम्मद इस्तियाक राई आगामी प्रतिनिधि सभा सदस्य निर्वाचनमा नेकपा एमालेको चुनाव चिह्न सूर्य लिएर उम्मेदवार बन्ने भएका छन्।
सोमबार राति पूर्वमन्त्री तथा जसपा नेता प्रदीप यादवसहितका नेताहरूसँग इस्तियाक राई नेकपा एमाले अध्यक्ष केपी शर्मा ओलीको गुण्डुस्थित निवास पुगेका थिए। उक्त भेटमा बाँके–२ बाट एमालेको चुनाव चिह्न लिएर उम्मेदवारी दिने विषयमा सहमति भएको बताइएको छ।
यसअघि गत शनिबार बसेको नेकपा एमाले सचिवालय बैठकले बाँके–२ क्षेत्र खाली राख्ने निर्णय गरेको थियो। सोही निर्णयअनुसार अहिले नयाँ राजनीतिक सहकार्यको ढोका खुलेको विश्लेषण गरिएको छ।
इस्तियाक राईले आफूले एमालेको चुनाव चिह्न लिएर निर्वाचन लड्ने विषयमा सल्लाह भएको पुष्टि गर्दै भने,
“अहिले एमालेको चुनाव चिह्न लिएर लड्ने सल्लाह भएको छ। एमालेको औपचारिक जिम्मेवारी लिएको छैन। चुनावपछि के हुन्छ भन्न सकिँदैन।”
राजनीतिक रूपमा अनुभवी मानिने इस्तियाक राई बाँके–२ बाट २०६४ र २०७४ सालको निर्वाचनमा निर्वाचित भएका थिए। २०७० को दोस्रो संविधान सभा निर्वाचन तथा २०७९ को प्रतिनिधि सभा निर्वाचनमा भने उनी पराजित भएका थिए। हालसम्म तीन पटक मन्त्री बनेका राईको उम्मेदवारीले बाँके–२ को चुनावी प्रतिस्पर्धा थप रोचक बन्ने देखिएको छ।
