बाँके । आगामी फागुन २१ गते हुने प्रतिनिधिसभा निर्वाचनलाई लक्षित गर्दै बाँकेका तीनवटै निर्वाचन क्षेत्रका २१ जना उम्मेदवारले निर्वाचन खर्च व्यवस्थापनका लागि छुट्टै बैंक खाता सञ्चालनमा ल्याएका छन्। निर्वाचन आयोगले उम्मेदवारहरूलाई निर्वाचन अवधिभरको सम्पूर्ण आर्थिक कारोबार पारदर्शी बनाउन अनिवार्य रूपमा अलग्गै बैंक खाता खोल्न निर्देशन दिएको थियो ।
आचारसंहिता अनुगमन जिल्ला समितिका अधिकृत पूर्णबहादुर खत्रीले यो व्यवस्था अनिवार्य भएको स्पष्ट पार्दै अटेरी गरे कारबाहीको भागी हुनुपर्ने चेतावनी दिनु भएको छ । उहाँले भन्नुभयो,“पटक–पटक उम्मेदवारहरूलाई छुट्टै खाता खोल्न निर्देशन दिइएको छ। नियम पालना नगर्नेहरूमाथि आवश्यक कारबाही अघि बढाइनेछ ।,” सहायक प्रमुख जिल्ला अधिकारीसमेत रहनुभएका खत्रीका अनुसार हालसम्म खाता नखोल्ने उम्मेदवारलाई पुनः चेतावनी दिने तयारी गरिएको छ ।
बैंक खाता सञ्चालनमा ल्याउने उम्मेदवारहरूमा क्षेत्र नम्बर २ का दिपेन्द्र विष्ट, मो. इस्तियाक राई, रामचरण चौधरी, जगदीश ढकाल, ऋषिराज देवकोटा, विवेककुमार श्रेष्ठ, शौभाग्यजंग शाह, शैलेन्द्रकुमार कर्ण, महेन्द्रप्रकाश चन्द लगायत रहनु भएको छ ।
निर्वाचन खर्च पारदर्शिता र आचारसंहिताको प्रभावकारी कार्यान्वयनका लागि आयोगले बैंक खाता अनिवार्य गरेसँगै बाँकेमा निर्वाचन गतिविधि थप व्यवस्थित र निगरानीयोग्य हुने बिश्वास गरिएको छ ।
