बाँके । मुस्लिम उद्योग व्यवसायी नेपालगंजका संयोजक सैयद मोहम्मद जाहगिरले व्यवसायीहरुको समस्यामा सरकार गम्भीर नभएको गुनासो गर्नुभएको छ । शनिबार नेपालगंजमा मुस्लिम उद्योग व्यवसायीले आयोजना गरेको कार्यक्रममा संयोजक जाहगिरले व्यवसायीहरुको अवस्था दिनप्रतिदिन कमजोर हुदै गए पनि सरकार गम्भीर नहुनु चिन्ताको विषय भएको बताउदै व्यवसायीहरुको समस्या समाधान गर्न सरकार संग माग गर्नु भयो । 
भेलामा सहभागी मुस्लिम व्यवसायीहरुले नेपालगंज उद्योग व्यपार संघ व्यापारीहरुको समस्यालाई भन्दा नवनिर्वाचित पदाधिकारीहरु आफनो व्यक्तिगत स्वार्थमा लिप्त रहेको देखे पछि मुस्लिम उद्योग व्यवसायीहरु संगठित भएका छन् ।
नेकपा एमालेका नेता एंव अडिटर अब्दुल करिम खानले अर्थतन्त्र जोगाउन सबै मिल्नुपर्ने र शिक्षित गराउनुपर्ने बताउनुभयो । उहाँले निजी क्षेत्रको सफलता नै देशको सफलता हुने भन्नुहुदै अर्थतन्त्र सुधारका विषयमा व्यवसायीहरुसँगै रहेको बताउनुभयो ।
नेकपा एसका नेता सकिल जसगढ, व्यवसायी सफिक बेहना, मेराज अहमद हिमाल, मुस्लिम संघका अध्यक्ष सुफियान खान लगायतले उद्योगी व्यवसायीहरुलाई हेर्ने दृष्टिकोणमा परिवर्तन आवश्यक रहेकोमा जोड दिनुभयो । सहि तरिकाले गरेको उद्योग व्यवसायबाट आर्जित नाफालाई समेत नकारात्मक दृष्टिकोणबाट हेर्नु उचित नभएको उद्योगी व्यवसायीहरुले बताउनुभयो । कार्यक्रमका सहभागिहरुले मुस्लिम व्यवसायी संघ तत्काल दर्ता गर्न सुझाव दिदै जहागिरको नेतृत्वमा तयारी समिति गठन गरिएको छ । कार्यक्रममा ३ दर्जन भन्दा बढी व्यवसायीहरुको सहभागिता रहेको कार्यक्रमको संचालन आरिफ अन्सारीले गर्नु भएको थियो ।
