बाँके । बाँकेको नेपालगञ्जमा रहेको दारुल उलुम फैजुन्नबी जामा मस्जिद इदगाह संचालक समितिका असन्तुष्ट बहुमत सदस्यहरूले हालै भएको तेस्रो साधारणसभाबाट अवैधानिक तरिकाले गठन गरिएको समिति खारेजको माग गर्दै ज्ञापनपत्र बुझाए पछि जिल्ला प्रशासन कार्यालय बाँकेले उक्त समितिलाई खारेज गरि दिएको छ ।
२४ घण्टा भित्रै समिति खारेज नगरे चरणबद्ध आन्दोलन गर्ने बहुमत सदस्यहरूले चेतावनी दिएपछि प्रमुख जिल्ला अधिकारी खगेन्द्र रिजालले छानबिन सुरु गरेर २४ घण्टा बित्न नपाउँदै अबैधानिक समितिलाई खारेज गर्दै जामा मस्जिदमा भएको भ्रष्टाचारको छानविन सुरु गरेको छ । 
आज बिहिबार जिल्ला प्रशासन कार्यालय बाँकेमा बसेको सर्वपक्षीय बैठकबाट पुर्व अध्यक्ष रहमान मियाँको अध्यक्षतामा समिति गठन गरिएको छ । समितिको उपाध्यक्षमा रौनक अलि इदरिसी, महासचिव अनुद्दीन अन्सारी र कोषाध्यक्षमा मोहम्मद हुसेन हल्वाइलाई चयन गरिएको छ भने पहिलो बैठकबाट सदस्यहरु मनोनित गर्ने अध्यक्ष मियाँले बताउनु भयो । 
