बाँके । नेपाली कम्युनिस्ट पार्टीले मुस्लिम समुदायको प्रतिनिधित्वलाई थप सुदृढ बनाउँदै बाँके जिल्लाबाट प्रतिनिधिसभाको समानुपातिकतर्फ दुई जुझारु महिला नेतृहरूलाई उम्मेदवार चयन गरेको छ । पार्टीले कालि मियाँ कस्मीरा र जामिया खातुनलाई मुस्लिम कोटाबाट समानुपातिक उम्मेदवार बनाएको हो ।
नेपालगञ्ज २ निवासी कालि मियाँ "कस्मीरा" र नेपालगञ्ज निवासी जामिया खातुन लामो समयदेखि पार्टी राजनीतिमा सक्रिय रहँदै आएकी नेतृहरू हुन् । मुस्लिम समुदायमा जन्मिएर देशको मुहार फेर्ने र जनताको दुःख हटाउने संकल्पसहित जनयुद्धमा होमिएकी मियाँ एक जुझारु र प्रतिबद्ध नेतृको रूपमा चिनिन्छिन् ।
त्यसैगरी, मुस्लिम महिलाहरूको अधिकार, समानता र सहभागिताका सवालमा निरन्तर संघर्ष गर्दै आएकी जामिया खातुन समुदायको आवाज बनेर राजनीतिमा सक्रिय रहँदै आएकी छन् । पार्टीले समानुपातिक उम्मेदवारको रूपमा जिम्मेवारी दिएपछि दुबै नेतृले यसलाई मुस्लिम समुदायप्रति पार्टीले देखाएको विश्वास र न्यायको रूपमा व्याख्या गरेका छन् ।
पार्टीमा सक्रिय रहँदै मुस्लिम समुदायका घर–घर पुगेर सुख–दुःखमा साथ दिँदै आएको योगदानको कदरस्वरूप उम्मेदवार चयन भएको नेतृहरूको भनाइ छ । बाँके जिल्लाबाट प्रतिनिधिसभाको समानुपातिकतर्फ दुबै जनालाई उम्मेदवार बनाइएपछि मुस्लिम समुदायमा नेपाली कम्युनिस्ट पार्टीप्रति विश्वास थप बलियो बनेको स्थानीयको प्रतिक्रिया छ ।
कालि मियाँ कस्मीरा मुस्लिम समुदायमा मात्र होइन, आम नागरिकमाझ पनि इमानदार, संघर्षशील र जनतासँग नजिक रहने नेतृका रूपमा परिचित छिन् । यस्तै, जामिया खातुन पनि महिला अधिकार र सामाजिक न्यायका मुद्दामा स्पष्ट धारणा राख्ने नेतृको रूपमा पहिचान बनाउँदै आएकी छन् ।
पार्टीको यो निर्णयले मुस्लिम समुदायको राजनीतिक सहभागिता, प्रतिनिधित्व र विश्वासलाई थप मजबुत बनाउने अपेक्षा गरिएको छ । 
