चितवन । राष्ट्रिय स्वतन्त्र पार्टीका सभापति रवि लामिछानेले जनमत पार्टीका अध्यक्ष डा. चन्द्रकान्त राउत (सिके राउत)को नेतृत्वमा सरकार बनोस् भन्ने आफ्नो चाहना भएको बताएका छन् ।
चितवनमा सोमबार पत्रकारसँग कुरा गर्दै उनले अहिले पनि रास्वपा ‘नो नट अगेन’ भएको भन्दै सो कुरा बताएका हुन् । अहिले जनताले थोरै ‘नो नट अगेन’ भनेकाले आफूहरुले २० सिट जितेको उनको भनाइ थियो ।
उनले भने, ‘हामीले नो नट अगेन भनिरहेका छौँ, म त चाहन्छु डा. सिके राउत नेतृत्वमा सरकार बनोस् । मधेसले पाओस । मेरो समर्थन । डा. सिके राउतको नेतृत्वमा सरकार बन्न सकोस्, मधेसले पाओस न प्रधानमन्त्री । म त्यसमा छु । तर संख्याले दिँदैन । हामी अहिले पनि अवश्य नो नट अगेन । हामी अहिले पनि नो नट अगेन भनिरहेका छौँ ।’
उनले आफ्नो पार्टी तत्काल सरकारमा जाने तयारीमा नरहेको पनि बताए । उनले भने, ‘सरकारमा जाने तयारी भन्ने होइन। परिस्थितिलाई मूल्यांकन गर्नुपर्ने हुन्छ।’
उनले सत्ता समीकरण परिवर्तन भएपछि सरकारमा जानु परेमा कारण स्पष्ट पारेर मात्रै सहभागी हुने बताए । उनले भने, ‘अहिले सरकारमा जाने नजाने भन्ने विषयमा पार्टीभित्र छलफल भएको छैन ।’,
रास्वपा छुट्टै परिचय बोकेर बनेको दल भएकाले पछिल्ला राजनीतिक घटनाक्रम नियाल्दै गरेको उनले बताए । आफ्नो दलको राजनीतिक अभ्यास सुरुआती चरणमा रहेको सभापति लामिछानेले उल्लेख गरे । सरकारलाई दिएको समर्थन फिर्ता नलिएको अवस्थामा अब के गर्ने भन्ने विषयमा पार्टीभित्र छलफल हुने उनको भनाइ थियो ।
आगामी वैशाख १० गते हुने चितवन क्षेत्र नम्बर २ को उपनिर्वाचनको तयारी सुरू गरेको उनले जानकारी दिए ।
