बाँके । जिल्ला ट्राफिक प्रहरी कार्यालय बाँकेले सवारी साधन चेक जाँचका नामा जबरजस्ती रकम असुल्ने प्रवृत्तिले साना तथा ठूला सवारी साधनका चालकहरु हैरान भएको पाइएको छ । 
चेकचाँजको नाममा सवारी चालकहरुबाट विभिन्न वहानमा रकम असुल्ने गरेको पीडितहरुले बताएका छन् । नेपालगञ्जको राप्ती सडक खण्डमा ट्राफिकहरु चेकजाँचका लागि बस्ने, चेक जाँचका क्रममा लाइसेन्स माग्ने, ब्लुबुक माग्ने, सबै कागजात दुरुस्त भएपनि एउटा एउटा बहाना बनाएर रकम झर्ने, मागे बमोजिमको रकम नदिए चाबी खोस्ने, वाइक जफत गरेर आफै लिएर हिड्ने, जरिवाना वापत लिएको रकमको आधा मात्र उल्लेख गरी रसिद थमाउने, सकभर रसिदै नकाट्ने उनीहरुको दैनिकी नै भएको पीडितहरुले बताएका छन् ।
ट्राफिक प्रहरीले राप्ती रोडमा आइतबार गरेको चेकजाँच रोचक देखिन्थ्यो । रोडको बिच सडकमा सवारी रोकेर रोड नै जान गरेर चेकजाँच गर्दा ठुलो सवारी चालकलाई मात्र नभएर पैदल यात्रामा रहेका नागरिकहरुलाई समेत समस्या हुने गरेको छ ।
यता जिल्ला ट्राफिक प्रहरी कार्यालय बाँकेको जिम्मेवारी पाएका प्रहरी निरिक्षक हिमालय शाहले जिल्लाको ट्राफिक व्यवस्थापनको सुधारका लागि विशेष अभियान चलाउनुका साथै विभिन्न योजना र कार्यक्रम बनाएर अगाडी बढ्ने बताएको २४ घण्टा बित्न नपाउँदै ट्राफिक प्रहरीहरु चेकजाँचका नाममा नागरिकलाई सास्ती दिइरहेको पाइएको छ ।
यता कोरोनाको संक्रमण तिब्र रुपमा बढी रहेकोमा बेला मास्क प्रयोग समेत नगरि सडक जाम गरेर चेकजाँच गर्दा कोरोना संक्रमणको उच्च जोखिम रहेकोले स्थानीयहरुले भिडभाड नगरिदिन माग गरेका छन् ।
ट्राफिक प्रहरी कार्यालय बाँकेका प्रमुख शाहलाई सम्पर्क गर्ने प्रयास गरे पनि सम्पर्क हुन सकेन ।
