विक्रम बुढाक्षेत्री
बाँके । हिन्दू नारीहरुको महान पर्व हरितालिका तीज नजिकिँदै छ । यतिखेर दर खाने कार्यक्रमले बाँकेका अधिकांश होटलहरुका हलहरु भरिएका छन् । अर्थात तीजको दरखाने कार्यक्रमले होटल व्यावसायीको यतिखेर राम्रै आम्दानी भई रहेको छ ।
विभिन्न संघ–संस्थाले आयोजना गर्ने दर खाने कार्यक्रममा प्रमुख अतिथि, विशिष्ट अतिथि, अतिथिलगायतलाई बोलाउने भाषण गर्ने प्रक्रिया प्राय सबै कार्यक्रममा देखिन्छ । जुन दर खाने कार्यक्रममा पनि हुन्छ ।
बिहीबार नेपाल प्रेस युनियन बाँके शाखाले आयोजना गरेको दर खाने कार्यक्रममा पनि अगाडिको स्टेजमा बस्ने व्यक्तिहरुको लर्को बढी देखिएको थियो । करिब दुई दर्जन बढी अतिथिहरु स्टेजमा बस्दै गर्दा उनीहरुको कुरा सुन्न स्टेज अगाडि बस्ने व्यक्तिहरु संख्या अतिथिभन्दा कम भएको देखिन्थ्यो ।
हामी कहाँ एउटा परम्परा नै छ, भरसख धेरै व्यक्तिहरुलाई स्टेजमा राख्ने र दुर्ई÷चार घण्टा भाषण गरेर बिताउने । यस्तो परम्पराबाट धेरे व्यक्तिहरुहरु वाक्क भई सकेकोे उदाहरण प्रेस युनियको कार्यक्रममा देखिएको थियो ।
अझ मंगलबार नेपालगन्जस्थित वाइन डाइन कटेजमा २५ जना उपस्थित रहेको कार्यक्रम अन्तिममा पुग्दासम्म ५ जनामात्रै थिए । ती पनि अतिथिमात्रै ।
यस्ता उदाहरणहरु धेरै कार्यक्रममा देख्न सकिन्छ । अब मानिसहरु घन्टौसम्म भाषण सुन्न चाहदैनन््। भन्ने देखिन्छ ।
तर नेपालगन्जमा चलचित्र पत्रकार संघ बाँके शाखाले आयोजना गरेको कार्यक्रममा माथिका कुनै पनि परिस्थिति देखिएन । नत स्टेजमा भाषण गर्ने व्यक्तिहरु नै देखिए ।
चलचित्र पत्रकार संघ नेपाल बाँके शाखाले हरेक वर्ष झै यस वर्ष पनि तीजको अवसरमा उक्त कार्यक्रम आयोजना गरेको थियो । तीजमा दर खाने बाहना समातेर बाँके शाखाले जिल्ला पहिलोपटक महिला पत्रकारहरुलाई समेटेर ‘चलचित्र पत्रकारितमा महिला पत्रकारको अवस्था र सम्भावना’ सिर्षकमा अन्तरक्रिया आयोजना गरेको हो ।
कार्यक्रममा बाँके शाखाकी सदस्य सावित्री विश्वकर्माको अध्यक्षता रहेको थियो भने प्रमुख अतिथिका रुपमा नेपाल पत्रकार महासंघ बाँके शाखाकी उपाध्यक्ष करुणा शाह रहेकी थिइन् । र स्टेजमा उनीहरु दुईजना मात्रै थिए ।
उक्त कार्यक्रममा जाने जो कोहीले कार्यक्रमको व्यवस्थापनालाई लिएर सकारात्मक टिप्पणीमात्रै गरेको देखियो । किनभने कार्यक्रममा बाँके शाखा सदस्य रजनी योगीले करिब ३ मिनेटमा आसनग्रहणदेखि उद्घाटन र अतिथि सत्कारसम्मको कार्यक्रम सम्पन्न गरिन् । त्यसपछि शाखाका उपाध्यक्ष समिरमात्र श्रेष्ठले करिब २ मिनेटमा बाँके शाखाको इतिहासदेखि स्वागत मन्तब्य अन्त्य गरे र कार्यक्रम संचालनलाई अन्तरक्रियातर्फ मोडे शाखाका सचिव विक्रम बुढाक्षेत्रीले ।
कार्यक्रमको अवधि करिब १ घण्टाको थियो । तर कार्यक्रममा करिब ४० मिनेट अन्तरक्रियामा सकियो । र बजेको १० मिनेटमा पत्रकार रजनी योगीलाई नगद २ हजार १ सयसहित कदर पत्र र सिने रोयललार्ई शुभकामना पत्र प्रदान, प्रमुख अतिथिको मन्तव्य र अध्यक्षले कार्यक्रम सम्पन्न गरिन् ।
कार्यक्रमको रोचक पक्ष भनेको १५ जनाको उपस्थितिबाट सुरु भएको कार्यक्रम अन्त्य हुँदासम्म ४० बढीको सहभागिता पुग्यो, कार्यक्रममा भाषण गर्ने ३ जनामात्रै थिए, स्टेजको तल विशिष्ट अतिथि, अतिथि र विभिन्न संघ–संस्थाका प्रतिनिधि तथा पत्रकारहरु थिए । जसका कारण थोरै जना रहेको कार्यक्रममा पनि धेरै जनाको सहभागिता जस्तो देखियो ।
कार्यक्रमको अन्तरक्रियामा बोल्ने अधिकांश वक्ताहरुले चलचित्र पत्रकारितामा सम्भावना रहेको बताए । उनीहरुले चलचित्र पत्रकार संघलाई समिक्षा खेलनका विषयमा तालिम आयोजना गर्न, कला क्षेत्रलाई पनि समाचारको माध्यमबाट बाहिर ल्याउन काम गर्नु पर्ने सुझाव दिएका थिए ।
कार्यक्रममा प्रमुख अतिथि शाहले छोटो समयमा चलचित्र पत्रकार संघ बाँके शाखाले धेरै कामहरु गर्दै आई रहेको र सानो टिम भएता पनि बाँकेको सक्रिय पत्रकारको संस्थाको रुपमा आगडि बढेको बताइन् । साथै बाँके शाखाले गर्ने हरेका कार्यक्रम अन्य संघठनभन्दा फरक रहेको उनले बताइन् ।
