बाँके । बाँकेको नरैनापुरमा भएको आगलागीमा एक दर्जन भन्दा धेरै घरगोठ जलेर नष्ट भएका छन् । नरैनापुर गाउँपालिका–४ जयरामपुर्वामा आज मंगलबार दिउसो ३ बजेबाट सुरु भएको आगलागीबाट १७ वटा घरभन्दा धेरै घरगोठ जलेर नष्ट भएको सशस्त्र प्रहरी नायब उपरीक्षक गजेन्द्र चन्द जानकारी दिनु भयो ।
दिउँसो जुमाई खाँको घरबाट लागेको आगो नेपालगंज उपमहानगरपालिकाको दमकल, नेपाल प्रहरी, सशस्त्र प्रहरी र स्थानीय बासिन्दाले नियन्त्रणमा लिएका थिए । खरले छाएका र एक आपसमा जोडिएका घरगोठ तथा तीव्र हावाहुरीले आगो नियन्त्रणमा लिन निकै मुश्किल परेको सशस्त्र प्रहरी उपरिक्षक चन्दले बताउनु भयो । आगलागीका कारण २५ लाखभन्दा बढीको क्षति भएको प्रारम्भिक अनुमान गरिएको छ ।
नरैनापुर गाँउपालिका अध्यक्ष शैयद इश्तियाक अहमद शाह, प्रमुख प्रशासकिय अधिकृत नवराज वली, वडा नं. ४ का अध्यक्ष मनोज शर्मा, जिन्सी शाखा प्रमुख लक्ष्मीकान्त मिश्रा र विपत शाखा प्रमुख भरत महतो सहितको टोलीले घटना स्थलमा पुगेर आगलागी पीडितलाई राहत दिने प्रतिबद्धता गर्नु भएको छ ।
विभिन्न निकायसँगको समन्वयमा आज रातिको लागि पाल र खानाको व्यवस्था गर्ने काम भइरहेको र जिल्ला विपद् व्यवस्थापन समितिलाई थप राहतको व्यवस्था गर्न माग गरिएको अध्यक्ष शाहले बताउनु भयो । 
