बाँके । बाँकेको डुडुवा गाउँपालिकामा युवाहरुले भ्रष्टाचार र अनियमितता विरुद्ध आन्दोलित हुँदै पालिका कार्यालयमै कडा प्रदर्शन गरेका छन्। कार्यालयभित्र लाखौं मूल्य बराबरको मदिरा फेला परेपछि स्थानीय आक्रोशित बनेका हुन् ।
स्थानीय युवाहरुको अगुवाइमा गरिएको प्रदर्शनका क्रममा पालिका अध्यक्ष र उपाध्यक्षको राजीनामा माग गरिएको छ। उनीहरूले पालिकालाई “भ्रष्टाचारको केन्द्र” भएको आरोप लगाउँदै तत्काल पदत्याग नगरेसम्म आन्दोलन अझ उग्र पारिने चेतावनी दिएका छन्।
युवाहरुले कार्यालयभित्र मदिरा जम्मा गरेर राखिएको तस्बिर र प्रमाण सार्वजनिक गरेपछि घटनाले ठूलो रुप लिएको हो। उनीहरूको भनाइमा, “जनताको करबाट चल्ने कार्यालयमा यस्तो अवैध कारोबार हुनु पालिका नेतृत्वकै संलग्नता बिना सम्भव छैन।”
आन्दोलनकारीहरूले पालिकाको ढोका अगाडि नारा लगाउँदै “भ्रष्टाचारी नरेन्द्र चौधरी मुर्दावाद” र “जनताको पैसा जनतामै खर्च गर” जस्ता नारासहित जुलुस निकालेका थिए। प्रहरीले सुरक्षालाई कडाइ गरे पनि युवाहरुले कार्यालयमा तोडफोड वा आगजनी हुन नदिएको जनाइएको छ । साथै पालिकाको सिसिटिभी फुटेज सार्वजनिक गर्न माग गरिएको छ
यसअघि पनि डुडुवा गाउँपालिकामा अनियमित खर्च, योजना वितरणमा पक्षपात र कर्मचारी मनपरीको गुनासो आइरहेको थियो। तर, यसपटक कार्यालयभित्रै ठूलो मात्रामा मदिरा भेटिएपछि आन्दोलन झनै चर्किएको छ।
आन्दोलनकारीहरूले स्थानीय जनप्रतिनिधिहरूले नै भ्रष्टाचारलाई संरक्षण गर्दै आएको आरोप लगाएका छन्। उनीहरू भन्छन्, “यदि छानबिन नगरी नेतृत्वलाई उही पदमा बस्न दिइयो भने डुडुवाका जनता सडकमै रहनेछन्।”
यसबीच, जिल्ला प्रशासन कार्यालय बाँकेले घटनाबारे प्रारम्भिक जानकारी लिएको र आवश्यक कारबाहीका लागि अनुसन्धान अघि बढाइने बताएको छ।
Raj