बाँके । बाँके जिल्लाको राप्ती सोनारी गाउँपालिका–७ झगडिया गाउँमा भएको आगलागिबाट विस्थापित बनेका ७ जना परिवारलाई वडा नंं ७ ले राहात उपलब्ध गराएको छ । राप्ती सोनारी ७ का झगडियाका बिरिजा गद्दी,जेलेश्वर गद्दी,द्ददु गद्दी, नूरुद्दीन गद्दी, नन्दे गद्दी, रमेश गद्दी र दिनेश गद्दीको पुरै घर जलेर नष्ट भएपछि तत्कालका लागि राहात उपलब्ध गराएको वडा अध्यक्ष राम लखन थारुले जानकारी दिनु भयो ।
मंगलबार बेलुका झगडियामा आगोलागी भएको हो । आगोलागीबाट जलेर ७ जनाको घर पुर्ण रुपमा नष्ट भई २० लाखभन्दा बढिको क्षति भएको छ । घर जलेर नष्ट भएपछि तत्कालका लागि अस्थाई बसोबासका लागि त्रिपाल, खाद्यान्न तथा भाँडाकुँडा उपलब्ध गराईएको वडा अध्यक्ष थारुले बताउनु भयो । 
वडा अध्यक्ष थारु पिडितहरुको घरमै पुगेर राहात सहयोग हस्तान्तरण गरेका हुन् । तत्कालका लागि राहात उपलब्ध गराईएको र गाँउपालिकाको तर्फबाट थप सहयोग पहल गरी रहेको बताउनुभयो ।
नरैनापुर गाउँपालिकाको दमकल, प्रहरी र स्थानीय बासिन्दाको सक्रियतामा आगो नियन्त्रणमा लिएको थियो भने दमकल समयमै आएकोले मानवीय क्षति भने नभएको प्रहरी उपरीक्षक तुल बहादुर कार्कीले जानकारी दिनु भएको थियो । आगलागीमा परी ४ वटा बाख्रा जलेको प्रहरीले जनाएको छ ।
