काठमाडौं । पाँच दलीय सत्ता गठबन्धनले वैशाख ३० गते हुने स्थानीय चुनावमा उपमहानगरको भागबण्डा टुंग्याएको छ ।
बुधबार प्रधानमन्त्री निवास बालुवाटारमा भएको बैठकले उपमहानगरको भागबण्डा टुंगो लगाएको सरकारका प्रवक्ता समेत रहेका कांग्रेस नेता ज्ञानेन्द्रबहादुर कार्कीले जानकारी दिए । उनका अनुसार ११ उपमहानगरमाध्ये कांग्रेसलाई सात र माओवादीलाई दुई र एकीकृत समाजवादी र जनता समाजवादीलाई एक–एकमा मेयर दिने सहमति भएको छ ।
कांग्रेसलाई धरान, इटहरी, कलैया, तुलसीपुर, बुटवल, नेपालगञ्ज र धनगढी उपमहानगर दिने सहमति भएको छ । माओवादी केन्द्रलाई जितपुर सिमरा र घोराही उपमहानगरपालिका प्रमुख दिने समहमति भएको नेता कार्कीले जानकारी दिए ।
त्यस्तै हेटौंडा उपमहानगरपालिका प्रमुख एकीकृत समाजवादीलाई र जनकपुर उपमहानगरपालिका प्रमुख जनता समाजवादी पार्टीलाई सहमति भएको नेता कार्कीले जानकारी दिए ।
गठबन्धनले महानगरको मंगलबार नै टुंगो लगाएको थियो । काठमाडौं, ललितपुर र विराटनगरको मेयर कांग्रेसले पाएको छ भने माओवादीले भरतपुर, नेकपा (एकीकृत समाजवादी) ले पोखरा र जनता समाजवादीले वीरगन्जको मेयर पाएका छन् ।
